Afiliación á Asociación Galega de Socioloxía (AGS)

A Asociación Galega de Socioloxía (AGS) é unha entidade científica que reúne a sociólogos/as e profesionais das ciencias sociais con interese en promover o desenvolvemento da socioloxía en Galicia. A afiliación á AGS permite formar parte dunha comunidade activa, participando en actividades de comunicación, colaboración e investigación no ámbito sociolóxico.

Tras o acordo adoptado na última Asemblea Xeral, a AGS mantén aberta unha campaña de novos socios e socias, coa finalidade de ampliar a base asociativa e impulsar novas iniciativas.

Categorías  e cotas de afiliación

A AGS ofrece as seguintes modalidades de afiliación:

Membro individual da AGS

• Dirixido a sociólogas e sociólogos, así como a profesionais das ciencias sociais, que desexen integrarse na asociación a título persoal, beneficiándose das actividades, recursos e redes profesionais que ofrece a AGS.
• Contía: 40 € (período bianual)

Membro individual grupo reducido

• Dirixido a desempregados/as, estudantes de grao, mestrado e doutoramento interesados en formar parte da AGS e participar na vida asociativa.
• Contía: 20 € (período bianual)

Membro colectivo

• Enfocado a asociacións, institucións ou entidades relacionadas coa socioloxía que queiran colaborar coa AGS e contribuír ao seu desenvolvemento.
• Contía: 40 € (período bianual)

A AGS contempla dous períodos de alta, garantindo en todos os casos unha afiliación cunha duración de dous anos naturais.

As altas efectuadas no primeiro trimestre do ano estenderanse ata o primeiro trimestre do segundo ano de referencia, mentres que as realizadas no resto do ano terán vixencia ata os meses de setembro-outubro do segundo ano.

O pagamento da cota dará dereito á expedición do certificado de membresía correspondente ao período bianual.

Beneficios de ser membro da AGS

Os membros da AGS gozan dos seguintes beneficios:

• Participación en grupos de traballo e áreas temáticas: Posibilidade de unirse a grupos especializados para desenvolver actividades e proxectos nas súas áreas de interese.
• Acceso a eventos e actividades: Participación en congresos, seminarios, talleres e outros eventos organizados pola AGS, moitos deles con tarifas reducidas para membros, como por exemplo o Congreso Español de Socioloxía (FES).
• Recursos exclusivos: Acceso a publicacións, informes e materiais especializados sobre a realidade sociolóxica en Galicia e no ámbito global.
• Visibilidade profesional: a través da difusión de información de interese na páxina web da AGS e newsletter, permitindo mostrar información profesional e biográfica, facilitando o contacto e a colaboración con outros membros.
• Participación en órganos de goberno: Dereito a participar e votar nas asembleas da AGS, así como a formar parte dos seus órganos directivos e comités.