Principios de actuación

A Asociación Galega de Socioloxía (AGS) promove unha cultura baseada na ética, a responsabilidade e a transparencia, co fin de fortalecer a confianza da comunidade sociolóxica e da sociedade galega na nosa labor.

A AGS comparte os principios do Código Deontolóxico Internacional da Asociación Internacional de Socioloxía (ISA), que toma como marco de referencia na práctica profesional e investigadora.

Estes Principios de actuación orientan a conduta da AGS e das persoas que a integran garantindo a coherencia cos valores que inspiran o exercicio responsable da socioloxía. Son de aplicación a todas as persoas asociadas, aos órganos de goberno e grupos de traballo, así como a quen participe nas actividades promovidas pola Asociación.

Principios Éticos

Transparencia e responsabilidade

• Garantir a claridade nos procesos de toma de decisións.
• Informar de maneira aberta e accesible sobre as actividades e acordos da AGS.
• Rendir contas regularmente ante os membros da asociación.

Pluralismo

• Fomentar o debate aberto e a pluralidade de opinións dentro da comunidade sociolóxica.
• Respectar as diferenzas ideolóxicas, teóricas e metodolóxicas.
• Defender a liberdade académica e profesional.

Inclusión e participación democrática

• Garantir que todos os membros da AGS teñan oportunidade de participar nas decisións da asociación.
• Fomentar a equidade de xénero e a representación de diversos colectivos dentro da organización.
• Protexer os dereitos e deberes dos socios/as dentro da AGS.

Honestidade e integridade na toma de decisións

• Adoptar unha actitude ética en todos os procesos de goberno da AGS.
• Evitar situacións de conflito de intereses. Se un membro da xunta directiva ou dun comité ten intereses persoais que poidan influír nunha decisión, deberá absterse de participar na deliberación e votación.
• Garantir que os recursos da AGS sexan utilizados con criterios de equidade e xustiza.

Uso responsable da información

• Utilizar a información interna da AGS unicamente para fins lexítimos da asociación.
• Respectar a confidencialidade das deliberacións internas, garantindo a protección de datos e información sensible.

Compromiso coa sociedade

• Promover o uso da socioloxía para o ben común e a mellora da sociedade galega.
• Defender a investigación rigorosa, o pensamento crítico e a ética profesional na análise social.
• Reforzar o papel da socioloxía na construción dunha sociedade máis xusta.